Фотафакт. У будслаўскім касцёле знойдзены схаваныя ў камуністычныя часы рэліквіі св. Кацярыны
Важная знаходка ў будслаўскім санктуарыі — тут выяўлены рэліквіі святой Кацярыны Александрыйскай (на здымку) — адны з самых рэдкіх у свеце, паведамляе сайт Catholic.by .
Апісанне рэліквій, якія калісьці размяшчаліся ў адным з бакавых алтароў будслаўскай святыні, было знойдзена ў архіўнай кнізе XVIII стагоддзя, складзенай падчас адной з яго інвентарызацый.
На гэты факт вікарый будслаўскай парафіі ксендз Міхал Бубен звярнуў увагу таму, што св. Кацярына Александрыйская лічыцца галоўнай апякункай чыгуначнікаў. Ксёндз Міхал — душпастыр чыгуначнікаў Мінска-Магілёўскай архідыяцэзіі.
«У трыдэнцкія часы пры кожным асвячаным алтары знаходзіліся тыя ці іншыя рэліквіі. Звычайна іх або ўмуроўвалі, або ставілі ў рэліквіярыі на алтар», — адзначыў вікарый.
Святар дадаў, што, пабачыўшы згадку пра рэліквіі ў кнізе, пачаў шукаць іх.
«У камуністычныя часы рэліквіі схавалі, каб зберагчы іх. Мы знайшлі іх 14 верасня — у дзень Узвышэння Святога Крыжа. Капсула з рэліквіямі святой была завернута ў мяшочак, але знаходзілася ў касцёле», — распавёў ксендз Міхал Бубен.
25 лістапада адбудзецца ўрачыстае ўнясенне рэліквій у будслаўскі санктуарый. Спецыяльна для гэтага ў Будслаў прыбудзе дапаможны біскуп Мінска-Магілёўскай архідыяцэзіі Юрый Касабуцкі.
Гэты дзень для ўнясення рэліквій у абноўленым рэліквіярыі абраны невыпадкова. 25 лістапада — літургічны ўспамін св. Кацярыны Александрыйскай.
«Радуюся, што ўдалося адшукаць гэтыя рэліквіі, — прызнаецца ксендз Міхал. — Іх вельмі складана атрымаць, таму ў некаторым родзе гэта унікальная рэч. Галоўныя рэліквіі знаходзяцца ў кляштары на Сінаі. Наколькі я ведаю, на Беларусі рэліквій св. Кацярыны больш нідзе няма. Прынамсі афіцыйна. У Польшчы яны ёсць у кляштары супольнасці сясцёр св. Кацярыны ў Бранева».
На ўрачыстасць унясення рэліквій прыбудуць і сестры з супольнасці св. Кацярыны, якія нясуць служэнне ў Гродне. Да ўдзелу ў святой імшы запрашаюцца таксама чыгуначнікі Беларусі і ўсе жадаючыя.
Фота: catholic.by
Обсудим?