Купалаўскi шрыфт — ад А да Я

 

Беларускія праграмісты, дызайнеры і даследчыкі творчасці Янкі Купалы прэзентавалі камп'ютарны шрыфт на аснове почырку паэта.

Шрыфт «Пясняр» зроблены да 110-годдзя творчай дзейнасці паэта. Як адзначаюць аўтары праекта, стварэнне шрыфту — унікальная і вельмі важная падзея ў гісторыі беларускай сучаснай культуры. Дзякуючы шрыфту, беларусы ва ўсім свеце змогуць падкрэсліць сваю нацыянальную прыналежнасць. Яшчэ адна мэта праекта — захаваць гістарычную і культурную спадчыну.

• Пры распрацоўцы шрыфту вывучаліся архіўныя рукапісы 1910-х гадоў. За эталон быў ўзяты чарнавы варыянт зборніка вершаў «Шляхам жыцця».

• Шрыфт падтрымлівае 3 алфавіты: беларускі і рускі (кірыліца), англійскі (лацінка).

• Шрыфт выкладзены для запампоўвання і свабоднага распаўсюджвання на ўмовах Creative Commons (CC BY - SA 4.0)

Аа. Распрацоўшчыкам давялося вельмі папацець над купалаўскімі рукапісамі, каб вывесці літару «А». «Жывая варыятыўнасць» знака абумоўлена тым, што сімвал «А» найбольш часта ўжываецца ў беларускім алфавіце.

Жж. Са шматлікіх варыяцый напісання загалоўнай і малой літары «Ж» распрацоўшчыкі шрыфту выбралі менавіта гэтую форму за яе самабытнасць.

Лл. Літара «Л» вылучаецца асаблівай далікатнасцю. У ёй наогул адсутнічае характэрны вострапачатковы росчырк почырку Купалы. Менавіта з гэтай літары пачынаецца сапраўднае прозвішча пісьменніка — Луцэвіч.

Фф. Купала адказна ставіўся да напісання «Ф». Напэўна, таму, што гэта самая малаўжывальная літара. Гук [Ф] ў беларускай мове з'явіўся вельмі позна і ёсць толькі ў запазычаных словах.

Ы. «Ы» самая адметная і пастаянная літара ў почырку пісьменніка. Трэба адзначыць, што яе спрошчаная форма не змянялася на працягу ўсяго жыцця.

Юю. Літара «Ю» зяўляецца адной з найменш ужывальных, але ў почырку Купалы яна самая размашыстая.

Яя. Купалаўскае «Я» простае і лёгкае, без асаблівых завіткоў. Літара «Я» добра адлюстроўвае існасць асобы.