Культура

На канцэрте 27 красавіка «Троіца» прадставіць кампазіцыі з новага альбома

27 красавіка ў мінскім Палацы культуры імя Шарко выступіць легендарнае этна-трыа «Троіца». Музыкі прадставяць слухачам кампазіцыі, якія гурт рыхтуе для новага альбома. Не абыдзецца і без хітоў.

«У нас не часта выходзяць дыскі, адпаведна, на канцэртах мы паказваем тое, што ўвойдзе ў новы альбом — гэта «Цар-агонь», «Мядзведзь». З'явіліся новыя творы «Святая зямля», «Яшчар», балада «А ў нядзельку», — распавёў «Еўрарадыё» лідар гурта Іван Кірчук. — Пра іх можна шмат расказваць, але гэта музыка, і яе трэба слухаць. Бо на сённяшні дзень гэтыя кампазіцыі больш нагадваюць фальклорныя сюіты і складаюцца з некалькіх частках. Будзе шмат музыкі, шмат інструментаў і песні з мінулых альбомаў, якія разбавяць працяглыя творы».

Калі новы альбом гурта пабачыць свет, яшчэ не вядома, бо, прызнаецца Іван Іванавіч, усё ўпіраецца ў грошы.