Мнение

Галіна Каржанеўская. ПРАБЛЕМА. Дзікі мак, або Гісторыя з жыцця глыбінкі

Галіна Каржанеўская. Нарадзілася на Случчыне ў сям’і аграномаў. З бацькамі пераехала ў Лагойскі раён, дзе некаторы час настаўнічала пасля заканчэння БДУ (філфак). З 1981 г. жыве ў Мінску. Працавала на рэспубліканскім тэлебачанні і ў газеце “Літаратура і мастацтва”. Паэт, крытык, драматург. Член Саюза беларускіх пісьменнікаў.

Патэлефанавала жыхарка горада Глыбокае (яна прасіла яе імя не называць) і распавяла наступную гісторыю.

На няўдобіцы бліз яе дома вырас дзікі мак, тры ўсяго калівы. І як толькі выгледзела іх пільнае міліцэйскае вока! Кветкі ж далекавата ад вуліцы.

З’яўляюцца два стражы парадку. Так і так, будзем складаць акт і штрафаваць вас. Давайце пашпарт. Яна свой пашпарт не падала, а шпурнула. Нервы якія ўжо? 76 стукнула. Рукі трасуцца, сэрца трасецца, збіралася нават “хуткую” выклікаць…

А яны пішуць і дапытваюцца, пішуць і дапытваюцца… У 15 месцах мо распісалася і так зразумела, што абышлася малой крывёю — штрафу не будзе.

А як сышлі змагары з наркатою, жанчына скеміла: ага, макі тут ні пры чым! Яны ж з мужам (царства яму Нябеснае) не раз збіралі подпісы, у турмы пісалі зняволеным. Канверт з партыйнай газеткай штомесяц прыходзіць на ягонае імя.

Канчатковае праясненне адбылося ў галаве, калі ўспомніла пра блізкія выбары. Прэзідэнцкія заўсёды пачынаюцца з таго, што выяўляюць і запалохваюць “ворагаў народа”. А яна хто для ўлады? Вораг і ёсць.

Бабуля ўсплакнула ад перанесенага стрэсу, пайшла і вырвала тыя кветкі-самасейкі. І вырашыла, што ад газеткі на ўсялякі выпадак адмовіцца. Каб не пасадзілі на старасці гадоў.

Меркаванні калумністаў могуць не супадаць з меркаваннем рэдакцыі. Запрашаем чытачоў абмяркоўваць артыкулы на форуме, прапаноўваць для ўдзелу ў праекце новых аўтараў або ўласныя матэрыялы