У ЗША адсвяткавалі 270-я ўгодкі Тадэвуша Касцюшкі
«Маючы прызнанне тут, у ЗША, Тадэвуш Касцюшка меў магчымасць пражыць сваё жыццё ў багацці і славе, але не мог быць абыякавым да падзеяў, што адбываліся ў той час на яго радзіме».
6 лютага ў Нью-Ёрку адзначылі 270-я ўгодкі Тадэвуша Касцюшкі, славутага ліцвіна, героя вайны за незалежнасць ЗША і лідэра паўстання за вызваленне Рэчы Паспалітай.
Грамадскі цэнтр Беларускага інстытута Амерыкі зладзіў святочнае мерапрыемства, на якое сабраліся прадстаўнікі беларускай дыяспары ў ЗША. Адмысловым госцем вечарыны стаў журналіст і грамадскі дзеяч Франак Вячорка.
Удзельнікі правялі дыскусію аб лёсе Касцюшкі і яго ролі ў гісторыі Беларусі і іншых краін, а таксама ўзялі ўдзел у святочнай віктарыне.
«Маючы прызнанне тут, у ЗША, Тадэвуш Касцюшка меў магчымасць пражыць сваё жыццё ў багацці і славе, але не мог быць абыякавым да падзеяў, што адбываліся ў той час на яго радзіме. Асоба Касцюшкі ўвасабляе гістарычную сувязь нашых народаў, з'яўляючыся сімвалам барацьбы за свабоду і яркім прыкладам вернасці сваім ідэалам. Шмат у чым гэтыя пачуцці блізкія і зразумелыя шэрагу беларусаў, што жывуць у замежжы. Таму памяць пра нашага героя павінна натхняць беларусаў у барацьбе за гэтыя ідэалы», — гаворыць дырэктар БIА Андрусь Асадчы.
Юбілей Касцюшкі шырока святкуецца па абодва бакі акіяна. У дзень нараджэння героя, 4 лютага, прадстаўнікі беларускай грамадскасці і мясцовых уладаў, а таксама замежныя дыпламаты ўсклалі кветкі ля дома-музея Касцюшкі на яго радзіме ў Мерачоўшчыне, што пад Брэстам.
Кветкі таксама ляглі да адзінага бюсту Касцюшкі ў Мінску, які ўсталяваны на тэрыторыі амбасады Злучаных Штатаў Амерыкі.
Павераны ў справах ЗША ў Беларусі Скот Роланд называе юбілей Касцюшкі нашым агульным святам.
«Шэраг краін на розных кантынентах лічаць яго сваім героем, узорам мужнасці і чалавекам прынцыпаў, — сказаў дыпламат. — Да яго з павагай і захапленнем ставіліся людзі на самых розных пасадах — ад прэзідэнта Томаса Джэферсана да імператараў і паплечнікаў-паўстанцаў. Ягоная роля ў вайне за незалежнасць Злучаных Штатаў, а таксама ўзначальванне польска-літоўскіх паўстанняў з'яўляюцца доказамі ягонага таленту».
У Філадэльфіі (штат Пенсільванія) існуе амерыканскі дом-музей Тадэвуша Касцюшкі. «Даўно пара ўсталяваць кантакты паміж двума музеямі — у Філадэльфіі і Мерачоўшчыне. Спядзяюся, гэта адбудзецца ўжо ў наступным годзе», — сказаў дыпламат.
Нью-Ёрк
Фота прадстаўлены Беларускім інстытутам Амерыкі і прэс-службай амбасады ЗША ў Беларусі
Обсудим?