"Дзеяслоў" не спіць між нумарамі
Кірыла ПАЗНЯК
- 12 лістапада а 18-й гадзіне ў Мінску ў Доме літаратара адбудзецца прэзентацыя новага літаратурна-мастацкага і публіцыстычнага выдання "Дзеяслоў". Што праўда, ён ужо прэзентаваўся, але ягоныя стваральнікі кажуць, што менавіта гэтая імпрэза лічыцца афіцыйнай прэзентацыяй.
-
-
- Першым разам "Дзеяслоў" паказалі шырокай публіцы амаль два месяцы таму — 23 верасня падчас з’езда Саюза пісьменнікаў. Гэта стала адным з чыннікаў таго, што на старшыню пісьменніцкай арганізацыі быў абраны малады літаратар Алесь Пашкевіч, намеснік галоўнага рэдактара "Дзеяслова". Дарэчы, галоўны рэдактар гэтага выдання Барыс Пятровіч (Сачанка) стаў намеснікам старшыні Саюза пісьменнікаў.
-
-
- Былі яшчэ рэгіянальныя прэзентацыі "Дзеяслова" — у Гомелі, Гродне, Віцебску, дзе на філфаках і ў абласных бібліятэках рэдакцыя выдання сустракалася, як кажа Барыс Пятровіч, "са сваімі будучымі чытачамі і аўтарамі".
-
-
- Тым не менш, з ягоных слоў, афіцыйная прэзентацыя "Дзеяслова" адбудзецца менавіта 12 лістапада. У вечарыне возьмуць удзел чальцы рэдакцыі альманаха, Ніл Гілевіч, Янка Брыль, Алесь Пісьмянкоў і іншыя вядомыя пісьменнікі. На імпрэзе выступяць барды. Беларускія літаратары, апрача таго што прачытаюць свае творы, натуральна, будуць казаць пра тое, як ім падаўся "Дзеяслоў" і чым ён можа стаць ці ўжо стаў у айчынным літаратурным працэсе, асабліва пасля таго як дзяржава навяла свае парадкі ў літаратурна-мастацкіх выданнях, стварыўшы холдынг "Літаратура і мастацва" ў складзе аднайменнай газеты і часопісаў "Полымя", "Неман", "Маладосць", "Крыніца", "Всемирная литература".
-
-
- Другі нумар "Дзеяслова" выйдзе пасля рэгістрацыі выдання. У рэдакцыі спадзяюцца, што да новага года. Галоўны рэдактар "Дзеяслова" Б.Пятровіч паведаміў, што ў наступным нумары з паэтычнымі творамі выступяць Рыгор Барадулін, Анатоль Вярцінскі, Васіль Зуёнак, Віктар Шніп, Сяржук Сыс (зямляк, але не сваяк Анатоля Сыса), Віктар Слінка, Сяржук Сокалаў-Воюш, з прозай — Уладзімір Сцяпан, Вінцэсь Мудроў, Сяргей Астравец, Пятро Васючэнка. Леанід Дранько-Майсюк.
Обсудим?