Культура

Прэзентацыя кнігі Сяргея Дубаўца «Як? Азбука паводзінаў» адбудзецца 16 верасня

 

Прэзентацыя новай кнігі пісьменніка, журналіста, выдаўца і шматгадовага аўтара «Радыё Свабода» Сяргея Дубаўца «Як? Азбука паводзінаў» адбудзецца 16 верасня ў Малой зале імя Рыгора Шырмы Беларускай дзяржаўнай філармоніі.

Новая кніга належыць да серыі «Бібліятэка Свабоды. XXI стагодзьдзе», у яе ўвайшлі бясстрашныя эсэ пра мадэлі этыкі для аўтарытарнага грамадзтва. Замест звыклых запытаў «Хто вінаваты?» і «Што рабіць?», аўтар шукае адказ на магічнае пытаньне «Як?».

«Кніга адрасаваная ўсім, і прачытаць яе мусіць кожны, — адзначыў Сяргей Дубавец у інтэрв'ю БелаПАН. — Выславіць я спрабаваў тое, што разам з эпохамі змяняецца і ўяўленне пра мараль, пра дабро і зло. Напрыклад, сёння прадаць сябра, здрадзіць свайму слову, падмануць — не такое ўжо злачынства, як раней. І гэта кепска. З іншага боку, умець прыстасоўвацца, быць багатым ці арыстакратычным раней лічылася за страшны грэх, а сёння гэта доблесць. І гэта добра. Мараль выяўляецца ў паводзінах і патрабуе штодзённага сцвярджэння таго, што добра, а што дрэнна. Інакш яна фантом. І я браў прыклады паводзінаў людзей палітыкі, бізнеса, культуры і разглядаў, што ў іх фантомнае, а што сапраўднае...»

У праграме прэзентацыі — выступы вядомых прадстаўнікоў беларускай культурнай прасторы, камернага хору пад кіраўніцтвам Кірылы Насаева, выстава графікі «Беларускі шрыфт». Прысутныя атрымаюць новую кнігу ў падарунак. Пачатак у 18.00. Уваход вольны.