На юбілейным «Калядным фэсце» чакаецца аншлаг!

За чатыры папярэднія гады фестываль стаў чаканай падзеяй для ўсіх аматараў беларускай фальклорнай музыкі...

«Калядны фэст» сёлета святкуе свой першы юбілей. За чатыры папярэднія гады фестываль стаў чаканай падзеяй для ўсіх аматараў беларускай фальклорнай музыкі, якая, у сваю чаргу, была і застаецца візітнай карткай беларускай музычнай культуры. Акрамя таго, “Калядны фэст” — своеасаблівая справаздача: музыкі паказваюць, што адбылося за год у сярэднявечнай і фольк-музыцы Беларусі.

Пяты калядны фестываль адбудзецца 25 снежня ў самым буйным мінскім клубе Re:public. На пытанне інтэрнэт-газеты Naviny.by, ці трэба было арэндаваць такі вялікі клуб для фестываля фальклорнай музыкі, арганізатар мерапрыемства Віталь Супрановіч упэўнена адказаў: “Штогод фэст збірае ад 600 да 1000 чалавек. Упэўнены, што і ў гэтым годзе будзе аншлаг”.

Паводле Віталя Супрановіча, “фэст з’яўляецца спробай беларускіх музыкаў паказаць сувязь сучаснасці з мінулым”. Канцэптуальна юбілейны фестываль не будзе асабліва адрознівацца ад папярэдніх. Прадзюсар патлумачыў, што канцэпцыя фэсту ужо вызначана, таму нейкіх зменаў не будзе: “Як заўсёды, мы збіраем найбольш цікавыя гурты сярэднявечнай і фольк-музыкі. Паказваем музыку ў самых розных накірунках: ад метала да дыджэйскіх апрацовак”.

На фестывалі традыцыйна зайграюць найлепшыя беларускія гурты сярэднявечнага і фальклорнага накірунку — добра вядомыя “Стары Ольса”, Znich, Litvintroll, Irdorath, Pawa, Lity taler. Таксама ў праграме сярэднявечныя танцы з танцавальнымі калектывамі “Гістрыён” і “Фламея”.

Арганізатар фестывалю распавёў, што гурт “Стары Ольса” парадуе гарачымі танцамі. Прысутныя пачуюць танцавальныя кампазіцыі з новага альбома калектыва Santa Maria, а таксама хіты мінулых гадоў.

Fantasy folk гурт Irdorath выступіць у новым абліччы, які арганізатары не раскрываюць, пакінуўшы наведнікаў фестывалі ў прыемнай невядомасці.

Гурт Pawa, вядомы сваімі арыгінальнымі эксперыментамі спалучэння дударскай і танцавальнай музыкі, падрыхтаваў новыя кампазіцыі “Беларуская Калядка” і “Беларуская Калыбель”.

Нязменным вядучым фэсту стане музыка Зміцер Сасноўскі — лідар гурта “Стары Ольса”.

Пра аўдыторыю фестываля і ўвогуле сярэднявечных і фолькавых канцэртаў Віталь Супрановіч кажа, што “звычайна яна дзеліцца на тых, хто хоча патанчыць, і тых, хто хоча пасядзець за столікам”.

“Таму, напрыклад, на канцэрце гурта “Стары Ольса” у “сідзячай” залі ёсць незадаволеныя, якія хочуць патанчыць. Заусёды, калі канцэрт адбываецца у клубе, за столікамі месцаў не хапае. На фэст яны ўсе рапрадаліся літаральна за пару дзён!

Публіка на фэсце збольшага, канешне, моладзь, якая хоча адарвацца ў клубе. Але штогод дастаткова і лядзей сярэдняга і нават сталага ўзросту. Я заўважыў, што на ўсе нашы канцэрты прыходзіць жанчына, якой год ужо 50, але яна заўсёды танчыць і нават прыводзіць моладзь. Можа, таму што яна танчыць сярэднявечныя танцы, яна і застаецца ў добрай форме і можа даць фору маладым?..”

Арганізатары фестываля стараюцца падтрымліваць беларускую скіраванасць як публікі, так і гуртоў. Усім, хто прыйдзе ў калядных строях, будуць падораныя дыскі з беларускай музыкай. “Але часта і без нашых заклікаў моладзь з задавальненнем прыходзіць у народных строях, што вельмі прыемна”, — падкрэсліў Віталь Супрановіч.