Уладзімер Падгол. МОВА. Агульнанацыянальная дыктоўка: “Магутны Божа”

Наша супольная дэманстрацыя можа стаць агульнанацыянальнай малітвай, якую пачуе Бог…

Уладзімер Падгол. Кандыдат філасофскіх навук. Апошні запіс у працоўнай кніжцы: з лютага 1997 года — кіраўнік інфармацыйна-аналітычнага цэнтра Прэзідыюма Вярхоўнага Савета 13-га склікання. Аўтар «Падручніка па апазыцыйнай барацьбе», кнігі «Асновы палітычнай псіхалогіі», раманаў «Куля для прэзідэнта», «Валадар Кулі», «Чортавы жорны», а таксама канцэпцыі амерыканскага «Акта аб дэмакратыі ў Беларусі». Кіраўнік ГА «Інфармацыйныя і сацыяльныя іннавацыі». Стваральнік Музея жорнаў.

Наблізіўся час найвялікшага нацыянальнага свята — Дня Волі. Па новай традыцыі мы можам адзначыць яго і агульнанацыянальнай дыктоўкай.

Першы раз мы пісалі агульнанацыянальную дыктоўку ў 2008 годзе ў гонар 90-годзьдзя БНР. Пісалі ва ўсіх куточках зямной кулі, дзе толькі жылі беларусы.

Да таго часу і па сёння такія дыктоўкі пішуць шмат якія эўрапейскія народы. А нашы суседзі палякі ды літоўцы пішуць свае дыктоўкі ўжо 20 год. Але ў іх іншая матывацыя — яны пішуць на выяўленнне лепшага знаўца мовы.

Мы ж адразу вырашылі пісаць дыктоўку салідарнасці з мовай і паміж сабой. Дыктоўку салідарнасці з продкамі і нашчадкамі. І нас падтрымалі прадстаўнікі розных цывілізаваных краін. Разам з намі беларускую дыктоўку пісалі амбасадары краінаў Эўразвязу, ЗША, Украіны, Ізраіля.

У мінулым годзе ўпершыню мы зладзілі і відэадэманстрацыю дыктоўкі салідарнасьі з нашым нацыянальным героем — Кастусём Каліноўскім. Выбітныя дзеячы беларускай культуры чыталі ў інтэрнэце ягоны запавет беларусам “Ліст з-пад шыбеніцы”. Гэтую дэманстрацыю бачыў увесь свет. Словамі Каліноўскага мы сказалі свету “Жыве Беларусь!” — што ў нашых душах жыве прага да волі, гатоўнасьць змагацца за яе, адраджаць беларушчыну.

Летась мы пачалі перапісваць Біблію ад рукі. І можа так стацца, што да 500-годзя надрукавння Скарынам Псалтыра — у 2017-м — мы перапішам Біблію.

Сёлета я прапаную напісаць агульнанацыянальную дыктоўку па тэксце Наталлі Арсенневай “Магутны Божа”. І таксама ўзяць удзел у відэадэманстрацыі дыктоўкі ў выкананні ўсімі, хто мае жаданне і мажлівасць зрабіць свой відэазапіс. Вядома ж, нашы знакамітыя дзеячы могуць стаць завадатарамі агульнанацыянальнай дыктоўкі салідарнасці. Уладальнікі інтэрнэт-сайтаў маглі б выставіць у сябе відэа дыктовак як у індывідуальным выкананні, так і начытаных эстафетным чынам.

Наша агульнанацыянальная дыктоўка можа стаць шчытом для абароны нашай мовы. Нашы словы, сказаныя і напісаныя разам, могуць стаць семям, якое прарасце любоўю да Беларусі ў душах нашых дзетак і ўнукаў. Наша супольная дэманстрацыя можа стаць агульнанацыянальнай малітвай, якую пачуе Бог. І стане магутным гімнам, які загартуе нашу волю дзеля абароны Айчыны.

Ад Дня волі да Уваскрэшання Хрыстова мы можам правесці супольную малітву: Дыктоўку ад Бога і да Яго. А 25 сакавіка напісаць усе разам нашу агульнанацыянальную дыктоўку “Магутны Божа”.

Каб не жыць пад дыктоўку рускіх, напішам дыктоўку па-беларуску!

Малітва за Беларусь (Магутны Божа)
Наталля Арсеннева

Магутны Божа! Уладар сусветаў,
Вялікіх сонцаў і сэрц малых!
Над Беларусяй, ціхай і ветлай,
Рассып праменне Свае хвалы.

Дай спор у працы спакойнай, шэрай,
На хлеб штодзённы, на родны край.
Павагу, сілу, і веліч веры
Ў нашу праўду, у прышласць — дай!

Дай урадлівасць жытнёвым нівам,
Учынкам нашым пашлі ўмалот.
Зрабі свабоднай, зрабі шчаслівай
Краіну нашу і наш народ.