Уладзімір Падгол. ПАЗІЦЫЯ. Сцяг ЗША ў рукі лідарам дысідэнтаў

Амерыканцы ў свой час падтрымалі права беларусаў быць незалежнымі і вольнымі. Надышоў час публічна аддзячыць іх за гэта.

 

 

Уладзімір Падгол

Уладзімір Падгол. Кандыдат філасофскіх навук. Апошні запіс у працоўнай кніжцы: з лютага 1997 года — кіраўнік інфармацыйна-аналітычнага цэнтра Прэзідыюма Вярхоўнага Савета 13-га склікання. Аўтар «Падручніка па апазыцыйнай барацьбе», кнігі «Асновы палітычнай псіхалогіі», раманаў «Куля для прэзідэнта», «Валадар Кулі», «Чортавы жорны», а таксама канцэпцыі амерыканскага «Акта аб дэмакратыі ў Беларусі». Кіраўнік ГА «Інфармацыйныя і сацыяльныя іннавацыі». Стваральнік Музея жорнаў.

4 ліпеня ў ЗША будзе свята — Дзень Незалежнасці.

Паважаныя беларускія палітыкі!

Шмат хто з вас быў у ЗША, мае там сяброў, або сустракаўся з дыпламатамі гэтай вялікай краіны, спецыялістамі.

Калі гаспадары ЗША прымалі Вас, яны заўсёды рабілі гэта гасцінна. Прадстаўлялі Вам начлег, ежу, пітво. Магчымасць атрымаць адукацыю і адпачынак. Да Вас прыслухоўваліся, з Вамі раіліся.

А на прыёмах налівалі келіхі віна — колькі душа прыме.

У ЗША жывуць вашыя паплечнікі па палітычнай дзейнасці і проста сябры. ЗША далі прытулак і некаторым нашым палітыкам, якія спазналі рэпрэсіі, змагаючыся за Незалежнасць Беларусі.

4-га ліпеня вы можаце публічна прадэманстраваць сваё стаўленне да традыцыі грамадзянаў ЗША: выйсці ў цэнтр Мінска са сцягам гэтай краіны і разам адзначыць сьвята Дзень Незалежнасці!

З гэтага дня мы можам пачаць распаўсюд амерыканскага сцяга і ведаў пра багатую краіну з добрымі і гуманнымі людзьмі. Вы маеце шанец увайсці ў гісторыю не проста як грантасосы, а як пачынальнікі новай грамадзка-палітычнай традыцыі, шануемай ва ўсім цывілізаваным свеце.

Амерыканцы ў свой час падтрымалі права беларусаў быць незалежнымі і вольнымі, шмат дапамаглі і дапамагаюць нам матэрыяльна. Надышоў час публічна аддзячыць іх за гэта — дэманстрацыяй павагі да іхняга сцяга.

Спадзяемся, што ў Вас, як у руплівых гаспадароў-палітыкаў, нарыхтаваны запас сцягоў ЗША розных памераў на такі ці падобны выпадак. Калі ж не, ці загадчык склада з’ехаў у адпачынак, а ключ не пакінуў, тады сцяжок ЗША можаце намаляваць самі. Хай ён будзе з няроўнымі рысамі, затое ад душы. Людзі гэта ацэняць. Ды і я, суаўтар гэтай ініцыятывы разам з Алесем Таўстыкам, гатовы даць Вам сцяжок ЗША ў арэнду на вечар. Кошт — 1 літр Jack Daniels. Жартую :) Хаця ў кожным такім жарце ёсць кропля віскі.

Выходзьце са сцягам ці сцяжком ЗША да менскай Ратушы. Станьце лідарамі апазыцыі. Тут для нас нядаўна граў амерыканскі аркестр. Хай жа зайграе музыка ў душах амерыканцаў, калі яны пабачаць свой родны сцяг у вашых руках.

А каб прагучаў джаз амерыканскіх выканаўцаў ля ратушы 4 ліпеня, мы парупімся.

 

Меркаванні калумністаў могуць не супадаць з меркаваннем рэдакцыі. Запрашаем чытачоў абмяркоўваць артыкулы на форуме, прапаноўваць для ўдзелу ў праекце новых аўтараў або ўласныя матэрыялы.