Магічная мапа Маладзечна ад Таццяны Беланогай

19.05.2014 / 15:31 / Общество Просмотры: 1829 Обсудить

Бард Таццяна Беланогая нарадзілася ў Мінску, але пасля разам з бацькамі пераехала ў Маладзечна, дзе жыла да 18 гадоў, пакуль не паехала вучыцца ў сталіцу. Спявачка расказала пра магічныя месцы горада, напоўненыя для яе пяшчотнымі ўспамінамі.

Цэнтральная гарадская бібліятэка імя Максіма Багдановіча

Вядома ж, гэта адзін з самых прыгожых будынкаў у горадзе, там высокія столі, там заўсёды праходзілі выставы карцін таленавітых мастакоў, там працуюць цудоўныя бібліятэкары. Калі я ішла ў бібліятэку, я ведала, што траплю ў прастору прыгажосці. Безумоўна, эстэтыка важная для мяне. Але самае вартае ў бібліятэцы — гэта кнігі. У нашай бібліятэцы можна хадзіць паміж стэлажамі і самой выбіраць кнігі. А зала даволі вялікая, кніжны фонд таксама немаленькі, таму я яшчэ любіла сам працэс выбару кніг.

Вялікі Гасцінец

Галоўная вуліца горада. Мне падабаецца назва. У Маладзечне Генадзь Карпенка перайменаваў усе вуліцы ў 90-х гадах. Мне падабаецца адчуванне падарожжа на гэтай вуліцы, тое, што дарога доўгая і да мэты яшчэ далёка.

Гарадскі парк

Ён ціхі, зялёны, акуратны. Я люблю гуляць па знаёмых дарожках. Той жа пейзаж, але я ўжо іншая.

Сутнасць праекта “Магічная мапа” кампаніі “Будзьма беларусамі!”: з існых адасобленых “пазлаў” — мясцінаў беларускіх гарадоў — стварыць агульную, актуальную калектыўную гарадскую гісторыю Беларусі. Горад — прастора супольная. І магічная мапа павінная стварацца супольна. Таму прапаноўваем стаць удзельнікам праекта ўсім, хто хоча падзяліцца сваімі таямнічымі ведамі.

Мы чакаем і вашых допісаў! Дасылайце на адрас кампаніі [email protected] (з пазнакай у тэме ліста “Магічная мапа”) спіс сваіх магічных месцаў (не больш за тры), тых месцаў, якія маюць сваю гісторыю і патэнцыйна будуць цікавыя іншым жыхарам горада. Дасылайце пералік разам з кароткім тлумачэннем: чаму гэтае месца для вас дарагое альбо чаму вы лічыце яго магічным, адметным. Найцікавейшыя аповеды будуць публікавацца на нашай старонцы “Магічная Мапа” і аздабляцца малюнкамі Андруся Такіндага. Калі вы малюеце самі, дасылайце і свае малюнкі!

♦ Чытаць пра праект “Магічная мапа” ад кампаніі “Будзьма беларусамі!”