Другие материалы рубрики «Общество»

  1. В ЕГУ провели конкурс преподавателей. Список закрыли от общественности
    Высказывается мнение, что внутренний отбор на должности преподавателей нужен был администрации ЕГУ, чтобы отсеять нелояльных преподавателей...
  2. Госконтроль насчитал миллиарды убытков, которых не было
    Проверив рыбхоз «Красная зорька», сотрудники КГК направили материалы в правоохранительные органы, но там состава преступления не нашли…


Общество

Магічная мапа Давыд-Гарадка ад Леаніда Дранько-Майсюка


Леанід Дранько-МайсюкПаэт расказаў пра месцы Давыд-Гарадка, якія зачароўвалі ў дзяцінстве і дзе пазней наведвала натхненне.




Замкавая гара

Ёсць у Давыд-Гарадку Замкавая гара; сама назва падказвае, што некалі над ёй узвышаўся замак. Гару называюць яшчэ і Царкоўнай, бо тут стаяў драўляны храм, але, на жаль, 6 траўня 1936 года ён згарэў. Мае ўзвышэнне і трэцяе імя — гара каралевы Боны! Магія — гэта, як вядома, тое, што чаруе, прыцягвае душу…



Памятаю, як мяне, маленькага хлопчыка, адным сваім выглядам зачароўваў, закалыхваў смарагдавы колер давыд-гарадоцкай гары. А цяпер мяне, літаратара, заварожвае тое, што яна мае тры назвы, тры імёны…

Аднойчы на гары каралевы Боны ў мяне з’явіўся верш:

Каралева Бона любіла мёд,
І таму для яе, як лёду,
Вазілі ў Варшаву, двойчы на год,
Па восем пудоў з дваццаці калод
Давыд-гарадоцкага мёду.

Каралеву Бону адольваў сум,
Што ні сон — на Мілан дарога…
Тут — балоты, валокі, інтрыгі, тлум;
Там — радзіма, вясны кіпарыснае шум,
Закаханасці першай знямога.

Каралеве Боне спрыянне было
На радзіме жаданай памерці…
Адпускаючы з вуснаў паволі цяпло,
Пакідаючы ў сэрцы Гарыні святло —
Чару з мёдам трымала на сэрцы.



Цвінтар

Другое магічнае давыд-гарадоцкае месца — багаты на крыжы, хвоі і бэз цвінтар (мясцовае вымаўленне — цвінтар); пасярэдзіне гэтай бэзавай прасторы — святлее блакітная на тры шатровыя купалы Георгіеўская царква; яе мянуюць яшчэ Юраўскай і Закаморскай (пабудавалі храм за мытнай каморай!).



Бачыце, таксама тры назвы, тры імёны!

Хто ні йдзе паўз гэтае месца — заўсёды паглядзіць на яго; паглядзіць на цвінтар і царкву.

І не трэба хрысціцца — дастаткова паглядзець…

У школьныя гады я любіў на цвінтары хавацца…


Рака Гарынь

Гэта трэці магічны вобраз (не месца, а менавіта вобраз!).

Тут магія пачынаецца з назвы: Га-ры-нь…



Рака даволі доўгая, а была і глыбокай, і шырокай — у 1930-я гады яе шырыня дасягала 130 метраў!

Яшчэ нядаўна, у 1960-я гады, па Гарыні хадзілі і грузавыя, і гандлёвыя, і пасажырскія параходы!

А сёння гэта рака-інвалід; яе скалечылі спачатку меліярацыяй, а пасля каналам!

Аднак магія застаецца, бо што такое слова Гарынь — я не ведаю.


Сутнасць праекта “Магічная мапа” кампаніі “Будзьма беларусамі!”: з існых адасобленых “пазлаў” — мясцінаў беларускіх гарадоў — стварыць агульную, актуальную калектыўную гарадскую гісторыю Беларусі. Горад — прастора супольная. І магічная мапа павінная стварацца супольна. Таму прапаноўваем стаць удзельнікам праекта ўсім, хто хоча падзяліцца сваімі таямнічымі ведамі.

Мы чакаем і вашых допісаў! Дасылайце на адрас кампаніі [email protected] (з пазнакай у тэме ліста “Магічная мапа”) спіс сваіх магічных месцаў (не больш за тры), тых месцаў, якія маюць сваю гісторыю і патэнцыйна будуць цікавыя іншым жыхарам горада. Дасылайце пералік разам з кароткім тлумачэннем: чаму гэтае месца для вас дарагое альбо чаму вы лічыце яго магічным, адметным. Найцікавейшыя аповеды будуць публікавацца на нашай старонцы “Магічная Мапа” і аздабляцца малюнкамі Андруся Такіндага. Калі вы малюеце самі, дасылайце і свае малюнкі!

Чытаць пра праект “Магічная мапа” ад кампаніі Будзьма беларусамі!”


Оценить материал:
Средний балл - 5.00 (всего оценок: 4)
Tweet

Ваш комментарий

Регистрация

В настоящее время комментариев к этому материалу нет.
Вы можете стать первым, разместив свой комментарий в форме слева

Интересные Факты

Загрузка ...