ОбществоПартнёр рубрики: lastrada.by — консультации по безопасному выезду и пребыванию за границей

Партал budzma.org прэзентаваў праект «Жывая гісторыя»

Культурніцкі партал budzma.org прэзентаваў новы медыйны праект «Жывая гісторыя». Наведнікаў рэсурсу кампаніі «Будзьма!» чакае серыя рэпартажаў, прысвечаных знакавым старонкам айчыннай гісторыі. Разам з журналістам Змітром Навіцкім усе ахвотныя запрашаюцца ў віртуальныя вандроўкі па гарадах і мястэчках, сведак вялікіх гістарычных падзей, якія назаўсёды засталіся ў гісторыі краіны. Новым праектам грамадска-культурніцкая кампанія "Будзьма беларусамі!" працягвае шэраг асветніцкіх акцый 2012 году, чарговая з якіх рэалізаваная супольна з парталам abw.by.

Новы праект «Жывая гісторыя» стартаваў 30 сакавіка і працягнецца да канца чэрвеня. Праект «Жывая гісторыя» — гэта серыя незвычайных рэпартажаў па самых сакральных месцах нашай краіны. Тузін «вандровак», унікальных паводле фармату і зместу. Усё, што вы баяліся ведаць пра гісторыю Беларусі.

Першая вандроўка ў фармаце “ў пошуках страчанага” прайшла па маршруце Мінск — Нясвіж. “Мармычучы радкі Уладзіміра Караткевіча, небагаты, але добрага роду дваранін па імені Зміцер Навіцкі разам з фатографам Глебам Малафеевым асядлаў жалезнага каня і паехаў па гарадах і мястэчках нашага Вялікага Княства. На жаль, не каб напіцца і п’яным з кручы ў Дняпро скакаць, а каб расказаць шаноўнаму панству пра магдэбургскае права. І пра тое, што ад яго засталося…”

Рэпартаж “Магдэбургскае права: вандроўка ў пошуках страчанага” чытайце тут. Новыя рэпартажы праекту — на сайтах budzma.org і abw.by.