Культура

У Купалаўскім тэатры адбудзецца вечар памяці Яўгена Шабана

15 студзеня ў Купалаўскім тэатры адбудзецца вечар памяці, прысвечаны 70-годдзю з дня нараджэння выдатнага айчыннага драматурга, паэта і рэжысёра Яўгена Шабана.

Пачаткам літаратурнай дзейнасці Я.П.Шабана лічыцца 1960 г. Першымі творамі былі вершы. Пісаў Яўген Пятровіч пра многае, аднак цэнтральнае месца ў яго паэтычнай творчасці займала Нарач, на беразе якой аўтар нарадзіўся і вырас. У сваёй жа драматургічнай творчасці Я.Шабан імкнуўся закрануць самыя набалелыя, вострыя пытанні сучаснасці. Я.Шабан стаў прадвеснікам "новай хвалі" у драматургіі, адным з першых адчуўшы неабходнасць змены ў ёй тэматычных і вобразна-стылёвых інтанацый.

Падчас вечарыны прагучаць вершы Я.Шабана, будуць паказаны відэаматэрыялы, фотавыстава аб жыцці і творчасці драматурга, а таксама сцэны са спектакляў у выкананні акцёраў з Мінска і Бабруйска. З успамінамі пра Я.П.Шабана выступяць вядомыя дзеячы сучаснай тэатральнай культуры Беларусі.