Мнение

Рыгор Кастусёў. ЛІНІЯ ФРОНТУ. Аб тактыка-эканамічных хітрасцях магілёўска-шклоўскай вертыкалі…

Рыгор Кастусёў. Намеснік старшыні Партыі БНФ, экс-кандыдат на пасаду прэзідэнта Рэспублікі Беларусь на выбарах-2010. Нарадзіўся ў 1957 годзе ў вёсцы Цяхцін Бялыніцкага раёна. У 1982 годзе скончыў Беларускую сельскагаспадарчую акадэмію па спэцыяльнасці інжынер-механік. Служыў у Савецкай арміі, працаваў галоўным інжынерам, дырэктарам саўгаса, дырэктарам Шклоўскага раённага аб'яднання жыллёва-камунальнай гаспадаркі. У 2001 годзе вымушаны быў сысці з пасады пад ціскам уладаў з-за працы ў камандах кандыдатаў ад дэмакратычных сілаў. Быў дырэктарам сумеснага беларуска-ўкраінскага прадпрыемства. Тройчы абіраўся дэпутатам мясцовых саветаў. Аўтар праграмы развіцця і рэфармавання жыллёва-камунальнай гаспадаркі Рэспублікі Беларусь на 2010-2015 гады, прапанаванай Партыяй БНФ.

“Некоторые должностные лица своими противоправными действиями наносят серьезный ущерб экономике и подрывают авторитет власти”, — заявіў Аляксандр Лукашэнка ў час даклада старшыні Гродненскага аблвыканкама аб перспектывах сацыяльна-эканамічнага развіцця вобласці.

З вуснаў кіраўніка краіны прагучала незадаволенасць запавольваннем тэмпаў развіцця Гродненскай вобласці, а таксама пралікамі ў працы з падборам кіруючых кадраў у рэгіёне.

“Я уже неоднократно говорил, что это зло мы будем выжигать каленым железом. Здесь неприкасаемых нет и быть не может. Вы об этом знаете, это не новость”, — падкрэсліў ён у час працоўнай нарады ў г. Гродна 14 лістапада. “…Но что происходит на Гроднинщине?” — задаўся ён пытаннем... 

А на Гродненшчыне, дзе зараз кіруе Уладзімір Краўцоў, які да лістапада 2013 г. працаваў у Магілёве, толькі за 9 месяцаў бягучага года раскрыта 69 злачынстваў карупцыйнай скіраванасці, здзейсненых асобамі, якія знаходзіліся на пасадах у органах улады і кіравання дзяржаўнымі ўстановамі, арганізацыямі і прадпрыемствамі.

А колькі ж іх засталося не раскрытымі?

Колькасны склад раскрытых злачынстваў можна смела лічыць надводнай, бачнай часткай карупцыйнага айсбергу. Інфармацыя аб яго асноўнай, падводнай частцы так і застанецца для грамадзян краіны цалкам недаступнай.

Падобнай была рэакцыя Лукашэнкі на вынікі працоўнай паездкі і ў Магілёўскую вобласць 5 лістапада. Як ён адзначыў, яму паступаюць трывожныя сігналы па сітуацыі ў Магілёўскай вобласці, і гэта інфармацыя, па яго словах, мае падцверджанне з незалежных крыніц.

Відаць, Аляксандр Рыгоравіч усё ж звяртае ўвагу на інфармацыю пра сітуацыю ў вобласці, што змяшчаецца на старонках нешматлікіх незалежных друкаваных выданняў шэрагу рэгіёнаў Магілёўшчыны.

За 9 месяцаў бягучага года па ўсіх эканамічных паказчыках Магілёўская вобласць вельмі шмат змінусавала ў параўнанні з адпаведным перыядам 2013-га. Толькі аб’ём вырабленага валавога прадукту склаў усяго 96,8%. Экспарт тавараў — 94%. І гэтак далей.

“Я сквозь пальцы не могу смотреть на такое положение дел в области, — падкрэсліў Аляксандр Лукашэнка. — Должны быть конкретные результаты. Если их нет, тогда надо думать, кто будет давать эти результаты”.

У час нарады прагучалі меркаванні як з боку кантралюючых структур, так і ад кіраўніцтва вобласці, Магілёва, Магілёўскага раёна адносна прычын нізкіх тэмпаў развіцця рэгіёна. На думку большасці прысутных на нарадзе, у вобласці не ўдалося выпрацаваць сістэмны падыход падбору кадраў.

У сувязі з гэтым Аляксандр Лукашэнка прыняў рашэнне прадаставіць старшыні Магілёўскага аблвыканкама Пятру Рудніку права да 15 лістапада прымаць любыя кадравыя рашэнні ў рэгіёне.

Цэлы тыдзень спадар Руднік думаў як распарадзіцца прадастаўленым яму правам і толькі 13 лістапада скарыстаўся такой магчымасцю. У гэты дзень ён знайшоў трох “ахвярных казлоў”, звольніўшы з пасад генеральных дырэктараў ТАА “Папяровая фабрыка “Спартак” у Шклове, ТАА “Магілёўскі металургічны завод”, ТАА “Бабруйсксельмаш”.

Прашарсціць па вертыкалі абл-, гар-, райвыканкамы, дзе заселі асноўныя віноўнікі зніжэння эканамічных паказчыкаў вобласці, у яго, відаць, зноўку духу не хапіла.

Так склалася, што ў гэты ж дзень, 13 лістапада, я атрымаў ліст № 2182 ад 12.11.2014 г. з Магілёўскага аблвыканкаму за подпісам першага намесніка старшыні аблвыканкама А.І. Чыкіды.

У гэтым адказе з аблвыканкаму на мой зварот ад імя грамадзянскай ініцыятывы “Шклоўскі Магістрат” у Адміністрацыю прэзідэнта аб хібах у эканоміцы і сацыяльнай сферы Шклоўскага раёну, спадар Чыкіда сцвярджае, што Магілёўскім аблвыканкамам і Шклоўскім райвыканкамам “праводзяцца неабходныя мерапрыемствы па забяспячэнню належнага ўзроўню сацыяльна-эканамічнага жыцця насельніцтва раёна і падтрыманню стабільнасці ў эканоміцы рэгіёна. Прамысловыя, сельскагаспадарчыя прадпрыемствы і аб’екты сацыяльнай сферы працуюць у адпаведным рэжыме”.

Асноўная прапанова грамадзянскай ініцыятывы аб вылучэнні на пасаду старшыні Шклоўскага райвыканкаму кандыдата эканамічных навук Пятра Мігурскага засталася па-за ўвагай чыноўнікаў. 

Па сведчаннях першага намесніка старшыні аблвыканкаму, “у раёне ўсе падзеі адбываюцца ў адпаведнасці з дзеючым заканадаўствм Рэспублікі Беларусь, у тым ліку падбор і назначэнне кадраў”.

Чытаючы адказ спадара Чыкіды, складваецца ўражанне, што ён або адсутнічаў на працоўнай нарадзе ў Магілёве 5 лістапада пад старшынствам кіраўніка краіны і не чытаў выніковых матэрыялаў нарады, або праспаў увесь час.

А можа быць лідэрства Шклоўскага раёна ў краіне па “мінусу” надояў малака на адну карову за 2013 год — гэта тактыка-эканамічная хітрасць магілёўска-шклоўскай вертыкалі?

А рэгулярныя крымінальныя справы, што ўзбуджаюцца на намеснікаў старшыні Шклоўскага райвыканкаму, кіраўнікоў прадпрыемстваў раёна за злоўжыванне службовым становішчам, і агульны, раскрыты сілавымі структурамі, карупцыйны складнік за чатыры апошнія гады каля 60 млрд. руб. — гэта адпаведны, запланаваны рэжым працы прадпрыемстваў і ўстаноў раёна?

Своеасаблівыя магілёўска-шклоўскія хітрасці ў наладжванні вытворчасці, дзейнасці ўстаноў і разнастайных арганізацый “паспяхова” былі перанесены і спадаром Краўцовым на Гродненшчыну. Менш года яму хапіла, каб па выніках пераўзыйсці сваіх былых калег па працы ў Магілёўскім аблвыканкаме.

Ну што можна сказаць аб такой дзейнасці прадстаўнікоў магілёўска-шклоўскай вертыкалі, што працуюць на разнастайных пасадах па ўсёй краіне? Якую карысць для беларускага народа яны прыносяць гэткай сваёй працай? А можа быць ад іх адна толькі шкода?

Каб вызначыць патрэбнасці для краіны такіх людзей і пасад, што яны займаюць, прапаную правесці ў Магілёўскай вобласці невялікі эксперымент.

Трэба на адзін месяц адправіць у адпачынак сем службовых асобаў аблвыканкама: старшыню, яго намеснікаў і кіруючага справамі. А таксама — апарат абласнога Савета дэпутатаў. А разам з імі ўвесь абслугоўваючы персанал, з пастаноўкай на прыкол службовых аўтамабіляў, апячатваннем і абясточваннем кабінетаў, зняццём міліцэйскай аховы.

Праз месяц, па выніках працы эканомікі вобласці, зрабіць высновы. Калі сітуацыя ў вобласці памяняецца да лепшага, або застанеца на тым жа ўзроўні, можна лічыць эксперымент паспяховым і распаўсюджваць яго на іншыя рэгіёны і ўзроўні вертыкалі.

Я ўпэўнены ў паспяховасці падобнага эксперымента.

Меркаванні калумністаў могуць не супадаць з меркаваннем рэдакцыі. Запрашаем чытачоў абмяркоўваць артыкулы на форуме, прапаноўваць для ўдзелу ў праекце новых аўтараў або ўласныя матэрыялы.